:

ವರದಿಗಾರರು : ಚೇತನ್ ರಾಜ್ ಟಿ ಎಸ್ || ಸ್ಥಳ : ಹುಣಸೂರ್
ವರದಿ ದಿನಾಂಕ : 21-11-2025

ಹುಣಸೂರಿನಲ್ಲಿ ಬಿ-ಖಾತಾ ಡಬಲ್ ಕಂದಾಯದ ಅನ್ಯಾಯದ ವಿರುದ್ಧ ಸತ್ಯ ಎಂ ಎಸ್ ಫೌಂಡೇಶನ್ ಆರೋಪ

1000ಕ್ಕೂ ಹೆಚ್ಚು ಕುಟುಂಬಗಳು ದ್ವಿಗುಣ ಕಂದಾಯ ಪಾವತಿಸಿ ನಷ್ಟ; ಜಿಲ್ಲಾಧಿಕಾರಿ ಮಧ್ಯಪ್ರವೇಶಿಸಬೇಕೆಂದು ಒತ್ತಾಯ ಹುಣಸೂರು: ಅನಧಿಕೃತ ಬಡಾವಣೆಗಳಲ್ಲಿ ವಾಸಿಸುವNearly 1000 ಕುಟುಂಬಗಳು ಬಿ-ಖಾತಾ ಪ್ರಕ್ರಿಯೆಯ ಹೆಸರಿನಲ್ಲಿ ಡಬಲ್ ಕಂದಾಯ ಪಾವತಿಸಿ ಅನ್ಯಾಯಕ್ಕೊಳಗಾಗಿರುವ ಗಂಭೀರ ಘಟನೆ ಬೆಳಕಿಗೆ ಬಂದಿದೆ. ಈ ವಿಷಯದಲ್ಲಿ ನಗರಸಭೆಯ ತಾರತಮ್ಯ ಕ್ರಮವನ್ನು ಖಂಡಿಸಿ, ತಕ್ಷಣದ ಪರಿಹಾರಕ್ಕೆ ಜಿಲ್ಲಾಧಿಕಾರಿ ಮಧ್ಯಪ್ರವೇಶಿಸಬೇಕೆಂದು ಸತ್ಯ ಎಂ ಎಸ್ ಫೌಂಡೇಶನ್ ಒತ್ತಾಯಿಸಿದೆ. ಸಂಸ್ಥೆಯ ಅಧ್ಯಕ್ಷ ಸತ್ಯಪ್ಪ ರವರು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, “ಸರ್ಕಾರದ ಬಿ-ಖಾತಾ ಆದೇಶವನ್ನು ನೆಪವಿಟ್ಟು ಹುಣಸೂರು ನಗರಸಭೆಯು ಐದು ವರ್ಷಗಳ ಡಬಲ್ ಕಂದಾಯವನ್ನು ಬಲವಂತವಾಗಿ ಸಂಗ್ರಹಿಸಿದೆ. ಪಕ್ಕದ ತಾಲೂಕುಗಳಲ್ಲಿ ಸಿಂಗಲ್ ಕಂದಾಯ ಮಾತ್ರ ಪಾವತಿಸಿಕೊಳ್ಳುತ್ತಿರುವುದು ಅಧಿಕಾರಿಗಳ ತಾರತಮ್ಯ ನೀತಿಯನ್ನು ಬಯಲು ಮಾಡುತ್ತದೆ,” ಎಂದು ಆರೋಪಿಸಿದರು.

ಅವರ ಹೇಳಿಕೆಯ ಪ್ರಕಾರ, ಹುಣಸೂರು ತಾಲ್ಲೂಕಿನಲ್ಲಿ 8000ಕ್ಕೂ ಹೆಚ್ಚು ಕುಟುಂಬಗಳು ಅನಧಿಕೃತ ಬಡಾವಣೆಗಳಲ್ಲಿ ವಾಸವಾಗಿದ್ದು, ಡಬಲ್ ಕಂದಾಯಕ್ಕೆ ಸಂಬಂಧಿಸಿದ ಸರಕಾರದ ಯಾವುದೇ ಅಧಿಕೃತ ಆದೇಶವನ್ನು ಸಾರ್ವಜನಿಕರಿಗೆ ಪ್ರಕಟಣೆ ಮೂಲಕ ತಿಳಿಸಿಲ್ಲ. ಈ ಬಗ್ಗೆ ಪ್ರಶ್ನಿಸಿದಾಗ ನಗರಸಭೆ ಅಧಿಕಾರಿಗಳು ಮೌನ ವಹಿಸುತ್ತಿದ್ದಾರೆ. ಸತ್ಯ ಎಂ ಎಸ್ ಫೌಂಡೇಶನ್ ಮಾರ್ಚ್ 27, 2025ರಂದು ಉಪವಿಭಾಗಾಧಿಕಾರಿಗಳ ಮುಖಾಂತರ ಸರ್ಕಾರಕ್ಕೆ ಮನವಿ ಸಲ್ಲಿಸಿತ್ತು. ಅನಂತರ ಸರ್ಕಾರವು ನಗರಸಭೆಗೆ ಸಿಂಗಲ್ ಕಂದಾಯವಷ್ಟೇ ಸಂಗ್ರಹಿಸಬೇಕು ಎಂದು ಸೂಚಿಸಿದೆ. ಇದರಿಂದ 8000ಕ್ಕೂ ಹೆಚ್ಚು ಫಲಾನುಭವಿಗಳಿಗೆ ರಿಲೀಫ್ ಸಿಕ್ಕಿದೆ.

ಮುಂಚಿತವಾಗಿ ಡಬಲ್ ಕಂದಾಯ ಪಾವತಿಸಿದ ಸುಮಾರು 1000 ಕುಟುಂಬಗಳಿಗೆ ಪರಿಹಾರ ಅಥವಾ ಸಮಂಜಸ ವಿವರಣೆ ನೀಡದಿರುವುದು ಸಾರ್ವಜನಿಕ ಅಸಮಾಧಾನಕ್ಕೆ ಕಾರಣವಾಗಿದೆ. ಕೋಟ್ಯಾಂತರ ರೂಪಾಯಿ ಕಂದಾಯ ಸಂಗ್ರಹಿಸಿದರೂ ನಗರಾಭಿವೃದ್ಧಿಗೆ ಬಳಸಿಲ್ಲ ಎಂಬ ಆರೋಪವೂ ಕೇಳಿಬಂದಿದೆ. ಹಾಲಿ ಮಾಜಿ ಶಾಸಕರು, ಸಂಸದರು ವಿಷಯದ ಬಗ್ಗೆ ಮೌನ ವಹಿಸಿರುವುದು ವಿಷಾದನೀಯ ಎಂದ ಸತ್ಯಪ್ಪ ರವರು, “ಜಿಲ್ಲಾಧಿಕಾರಿ ಈಗ ನಗರಸಭೆ ಅಧ್ಯಕ್ಷರ ಹುದ್ದೆ ಕೂಡ ವಹಿಸಿಕೊಂಡಿದ್ದಾರೆ. ಆದ್ದರಿಂದ ತಕ್ಷಣ ಮಧ್ಯಪ್ರವೇಶಿಸಿ ಅನ್ಯಾಯಕ್ಕೊಳಗಾದ ಕುಟುಂಬಗಳಿಗೆ ನ್ಯಾಯ ಒದಗಿಸಬೇಕು. ಇಲ್ಲದಿದ್ದರೆ ನಗರಸಭೆ ಕಚೇರಿ ಮುಂಭಾಗದಲ್ಲಿ ಮಹಾಪ್ರತಿಭಟನೆ ನಡೆಸಲಾಗುವುದು,” ಎಂದು ಎಚ್ಚರಿಸಿದರು.