:

ವರದಿಗಾರರು : ಮೀನಾಕ್ಷಿ ರಮೇಶ್ ರಾಠೋಡ್ || ಸ್ಥಳ : ಬೆಂಗಳೂರು
ವರದಿ ದಿನಾಂಕ : 12-03-2025

ಮಸ್ಕ್‌ ಕಂಪನಿ ಜೊತೆ ಜಿಯೋ, ಏರ್‌ಟೆಲ್‌ ಒಪ್ಪಂದ !

ನವದೆಹಲಿ: ಭಾರತದಲ್ಲಿ ಉಪಗ್ರಹ ಆಧರಿತ ವೇಗದ ಇಂಟರ್‌ನೆಟ್‌ ಸೌಲಭ್ಯ ಒದಗಿಸಲು ಎಲಾನ್‌ ಮಸ್ಕ್‌ (Elon Musk) ಅವರ ಸ್ಪೇಸ್‌ಎಕ್ಸ್‌ ಜೊತೆ ಒಪ್ಪಂದ ಮಾಡಿಕೊಂಡಿರುವುದಾಗಿ ಏರ್‌ಟೆಲ್‌ ಮತ್ತು ಜಿಯೋ ತಿಳಿಸಿವೆ.

ಭಾರತಕ್ಕೆ ಸ್ಟಾರ್‌ಲಿಂಕ್ ಇಂಟರ್ನೆಟ್ ಸೇವೆಯನ್ನು ತರಲು ಸ್ಪೇಸ್‌ಎಕ್ಸ್‌ನೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳುವ ಬಗ್ಗೆ ಏರ್‌ಟೆಲ್ (Airtel) ಘೋಷಣೆ ಮಾಡಿತ್ತು. ಅದರ ಬೆನ್ನಲ್ಲೇ, ಮುಖೇಶ್ ಅಂಬಾನಿಯವರ ಜಿಯೋ (Reliance Jio) ಬುಧವಾರ ಎಲಾನ್ ಮಸ್ಕ್ ಅವರ ಕಂಪನಿಯೊಂದಿಗೆ ಇದೇ ರೀತಿಯ ಒಪ್ಪಂದವನ್ನು ಘೋಷಿಸಿದೆ.

ಈ ಒಪ್ಪಂದವು ಭಾರತದ ಅತ್ಯಂತ ಗ್ರಾಮೀಣ ಮತ್ತು ದೂರದ ಪ್ರದೇಶಗಳನ್ನು ಒಳಗೊಂಡಂತೆ ದೇಶಾದ್ಯಂತ ವಿಶ್ವಾಸಾರ್ಹ ಬ್ರಾಡ್‌ಬ್ಯಾಂಡ್ ಸೇವೆಗಳನ್ನು ತಲುಪಿಸಲು ಸಹಾಯ ಮಾಡುತ್ತದೆ. ಜಿಯೋ ತನ್ನ ಚಿಲ್ಲರೆ ಮಾರಾಟ ಮಳಿಗೆಗಳಲ್ಲಿ ಸ್ಟಾರ್‌ಲಿಂಕ್ ಉಪಕರಣಗಳನ್ನು ನೀಡುವುದಲ್ಲದೆ, ಗ್ರಾಹಕ ಸೇವಾ ವಲಯದಲ್ಲಿ ಉತ್ತಮ ಕಾರ್ಯನಿರ್ವಹಿಸಲು ಸಹಕಾರಿಯಾಗಲಿದೆ ಎಂದು ಜಿಯೋ ಮಾಧ್ಯಮ ಪ್ರಕಟಣೆಯಲ್ಲಿ ತಿಳಿಸಿದೆ.

ಉಪಗ್ರಹ ಸೇವೆಗಳಿಗೆ ದೇಶವು ಸ್ಪೆಕ್ಟ್ರಮ್ ಅನ್ನು ಹೇಗೆ ನೀಡಬೇಕು ಎಂಬುದರ ಕುರಿತು ಎರಡು ಕಂಪನಿಗಳು ಪೈಪೋಟಿ ನಡೆಸಿದ ನಂತರ ಈ ಪಾಲುದಾರಿಕೆ ಬಂದಿದೆ. ರಿಲಯನ್ಸ್ ಹರಾಜಿಗೆ ಒತ್ತಾಯಿಸಿತ್ತು. ಆದರೆ ಭಾರತ ಸರ್ಕಾರವು, ಜಾಗತಿಕ ಪ್ರವೃತ್ತಿಗಳಿಗೆ ಅನುಗುಣವಾಗಿ ಆಡಳಿತಾತ್ಮಕವಾಗಿ ಅದನ್ನು ಹಂಚಿಕೆ ಮಾಡಬೇಕೆಂದು ಬಯಸಿದ್ದ ಮಸ್ಕ್ ಪರವಾಗಿ ನಿಂತಿತು.

ಮಂಗಳವಾರ, ಭಾರತಿ ಏರ್‌ಟೆಲ್ ಕೂಡ ಸ್ಟಾರ್‌ಲಿಂಕ್ ಇಂಟರ್ನೆಟ್ (Starlink internet) ಅನ್ನು ಭಾರತಕ್ಕೆ ತರಲು ಎಲಾನ್ ಮಸ್ಕ್ ಅವರ ಸ್ಪೇಸ್‌ಎಕ್ಸ್ ಜೊತೆ ಒಪ್ಪಂದಕ್ಕೆ ಸಹಿ ಹಾಕಿರುವುದಾಗಿ ಘೋಷಿಸಿತ್ತು. ಇದು ಭಾರತದಲ್ಲಿ ಸಹಿ ಮಾಡಲಾದ ಮೊದಲ ಒಪ್ಪಂದವಾಗಿದ್ದು, ದೇಶದಲ್ಲಿ ಸ್ಟಾರ್‌ಲಿಂಕ್ ಅನ್ನು ಮಾರಾಟ ಮಾಡಲು ಸ್ಪೇಸ್‌ಎಕ್ಸ್ ತನ್ನದೇ ಆದ ಅಧಿಕಾರವನ್ನು ಪಡೆದರೆ ಮಾತ್ರ ಇದು ಅನ್ವಯವಾಗುತ್ತದೆ.‌

‘ಭಾರತದ ಗ್ರಾಮೀಣ ಪ್ರದೇಶಗಳಲ್ಲಿರುವ ಏರ್‌ಟೆಲ್‌ ಗ್ರಾಹಕರಿಗೂ ಸ್ಟಾರ್‌ಲಿಂಕ್‌ ಸೇವೆ ನೀಡಲು ಸ್ಪೇಸ್‌ಎಕ್ಸ್‌ನೊಂದಿಗೆ ಕೆಲಸ ಮಾಡುವುದು ಮಹತ್ವದ ಮೈಲುಗಲ್ಲಾಗಿದ್ದು, ಮುಂದಿನ ಪೀಳಿಗೆಯ ಉಪಗ್ರಹ ಸಂಪರ್ಕಕ್ಕೆ ಕಂಪನಿಯ ಬದ್ಧತೆ ಪ್ರದರ್ಶಿಸುತ್ತದೆ’ ಎಂದು ಏರ್‌ಟೆಲ್‌ ತಿಳಿಸಿತ್ತು.